Sant Devey
Nou lorganizasion finn mont bann Sant Devey pou bann ti zanfan dan plizir landrwa dan Moris. Sa bann sant-la donn bann swin zanfan dan lakres depi laz 14 semenn ziska 3 z’an, enn ledikasion preskoler pou zanfan ant 3 e 5 an, e enn swivi pou bann zanfan 5an+ dan domenn psiko-sosial e edikatif.
Program ki nou propoze permet stimilasion ki bizin pou devlopman integral e li baze lor enn lapros psiko-sosio-pedagozik, kiltirelman informe e baze lor lang maternel akot fer aprantisaz atraver bann metod aktiv.
Bann fami e lakominote partisip aktivman dan program-la. Nou fer sa atrver bann program otosifizans alimanter, artizan, swivi e akonpagnman pou gagn akse a bann servis sosial e bann program lekout-konsey.
Nou ousi met lanfaz lor bann madam ansint atraver enn program antenatal koeran alor ki ena enn program pou prepar deza bann zanfan dan lakaz avan ki zot rant gardri.