Kouma enn antite legal, Fondation pour L’Enfance Terre de Paix enn lorganizasion ki anrezistre opre Registrar of Association dan Moris.
Pou li fonksione, li ena enn lasanble zeneral tou so bann mamb, enn komite direksion ki eli sak de z’an e enn komite konsiltatif.
Komite konsiltatif, li enn platform demokratik kot tou bann mamb kapav exprim zot lopinion lor size travay ou seki pe pase dan sosiete e ki ena enn linpak lor fonksionnman lorganizasion. Li sey azir kouma enn pon ant lavi personnel e lavi profesionel par interes so bann mamb e zot fami pou vinn partisip ladan. Travay komite konsiltatif finn montre so linportans akoz li donn bann lekleraz a lasosiasion kan ena pou pran bann desizion.
Onivo operasionel ena enn direkter ek enn asistan-direkter ki an-sarz.
Sak younit ena enn kordinater e sak mwa ena enn komite zesion pou fer swivi bann program.
Nou Mision
Kontribie pou amenn enn sosiete akot ena plis limanite atraver enn lalit permanan kont ninport ki form lamizer ek zot konsekans lor bann fami, sirtou bann zanfan, avek konsians ki nou pou arive lor baz ki bann fami ek bann zanfan ousi pou ena bann zouti neseser pou zwenn nou dan sa konba-la.
Nou Vizion
Enn sosiete kot sak zanfan gagn bann kondision neseser ki permet li vinn enn dimounn avek kapasite, li ousi, pou kontribie dan progre limanite.